FREE DELIVERY INCLUDED 

‘चिरंतनाच्या चाहूलवाटा’ हे अरुण खोपकर यांचे कलाविषयक लेखांचे सातवे पुस्तक आहे. लेखन, चित्रपटदिग्दर्शन, निर्मिती आणि कलासमीक्षा या विविध क्षेत्रांत महत्त्वपूर्ण योगदान देणाऱ्या खोपकर यांना त्यांच्या लेखनासाठी ‘साहित्य अकादेमी’ पुरस्कार, ‘महाराष्ट्र फाउंडेशन (अमेरिका)’चा ‘साहित्य जीवन गौरव’ पुरस्कार तसेच इतर अनेक प्रतिष्ठित सन्मान प्राप्त झाले आहेत. चित्रपट दिग्दर्शन आणि निर्मितीसाठीही त्यांना पंधरा राष्ट्रीय व आंतरराष्ट्रीय पारितोषिकांनी गौरवण्यात आले आहे.

चंद्रकांत पाटील यांनी संपादित केलेल्या या पुस्तकात फिल्म इन्स्टिट्यूटमधील लेखकाच्या आठवणींबरोबरच कुमार गंधर्व, भास्कर चंदावरकर, ऋत्विक घटक, महात्मा गांधी अशा विविध क्षेत्रांतील महत्त्वपूर्ण व्यक्तिमत्त्वांकडे अभिनव आणि चिकित्सक दृष्टिकोनातून पाहणारे दहा दर्जेदार, अभ्यासपूर्ण आणि लालित्यपूर्ण लेख समाविष्ट आहेत. कला, कलाकार आणि त्यांच्या निर्मितीमागील वैचारिक व सांस्कृतिक संदर्भ उलगडून दाखवण्याची खोपकर यांची वैशिष्ट्यपूर्ण शैली या लेखांतून प्रत्ययास येते.

या पुस्तकाचा विशेष कणा म्हणजे जगप्रसिद्ध रशियन सिनेदिग्दर्शक आणि चित्रपटविचारवंत सर्गेई आयझेन्श्टाईन यांच्या कार्यावरील तीन दीर्घ लेख. सिनेकलेच्या निर्मिती, अध्यापन आणि विश्लेषणाच्या क्षेत्रात आयझेन्श्टाईन यांच्या योगदानाचा खोपकर यांनी रशियन भाषेतील मूळ साहित्याच्या आधारे सखोल अभ्यास केला आहे. या विषयावरील त्यांचे लेखन आंतरराष्ट्रीय स्तरावरही मान्यताप्राप्त आहे.

पुस्तकाचे आणखी एक वैशिष्ट्य म्हणजे मॉस्को येथील आयझेन्श्टाईन संशोधन केंद्राकडून प्राप्त झालेली आणि इतर स्रोतांतून संकलित केलेली सुमारे २५० दुर्मीळ छायाचित्रे व रेखाटने. त्यामुळे ‘चिरंतनाच्या चाहूलवाटा’ हा केवळ वाचनीयच नव्हे, तर कलारसिकांसाठी संग्रहणीय आणि संदर्भमूल्य असलेला महत्त्वपूर्ण ग्रंथ ठरतो.