एकनाथ आव्हाड आता छान छान काव्यकोडी घेऊन बालकुमार वाचकांच्या भेटीला आले आहेत. उमलत्या वयातील मुलामुलींना, एकमेकांना कोडी घालायला आणि कोडी सोडवायला खूप आवडते. कोडी ऐकताना किंवा वाचताना ऐकणाऱ्याच्या किंवा वाचणाऱ्याच्या डोळ्यांत एक वेगळीच चमक येते. ही चमक उत्कंठेची असते, उत्सुकतेची असते, जाणून घेण्याची असते. काव्यकोडी तशी कमीच लिहिली जातात. जी लिहिली आणि छापली जातात, ती फारशी रंजक आणि उत्कंठावर्धक असतात, असेही नाही.

ही अडचण लक्षात घेऊन आव्हाड यांनी जाणीवपूर्वक आणि अभ्यासपूर्वक उत्तमोत्तम काव्यकोडी लिहिली आहेत. या कोड्यांमध्ये विषयांची विविधता आहे. विविध खेळ आणि खेळाडू, समाजसुधारक आणि शास्त्रज्ञ, संशोधक आणि क्रांतिकारक, लेखक आणि कवी, गडकिल्ले आणि शहरे, पशुपक्षी आणि फुलेफळे, धान्य आणि खाद्यपदार्थ, व्याकरणातील रूक्ष आणि अवघड संकल्पना, आपली ज्ञानेंद्रिये आणि कर्मेंद्रिये यांच्याविषयीची रंजक माहिती कोड्यांच्या माध्यमातून सांगितली आहे. म्हणी आणि वाक्प्रचारही यातून सुटले नाहीत. आयते ज्ञान मिळण्याच्या या काळात कोड्यांचा मनोरंजक खेळ दुर्मीळ होत चालला आहे. अशा कालखंडात या कोड्यांच्या माध्यमातून मनोरंजन आणि ज्ञान जिवलग मित्रांसारखे हातात हात घालून आले आहेत.

लेखकाविषयी माहिती : एकनाथ आव्हाड हे बालसाहित्यकार व कथाकथनकार आहेत. मुंबई महानगरपालिकेच्या शाळेत गेली ३१ वर्षे शिक्षक म्हणून कार्यरत. कथाकथन तंत्र आणि मंत्र या कार्यशाळेचे आयोजन. पुरस्कार : छंद देई आनंद या बालकवितासंग्रहास भारत सरकारचा साहित्य अकादमी बालसाहित्य पुरस्कार (२०२३). महाराष्ट्र शासनाचा गंमत गाणी या जोडाक्षर विरहित बालकवितासंग्रहास वा.गो.मायदेव उत्कृष्ट बालसाहित्य पुरस्कार (२००८), शब्दांची नवलाई या त्यांच्या बालकवितासंग्रहास बालकवी उत्कृष्ट बालसाहित्य पुरस्कार (२०२०) मुंबई महानगरपालिकेचा आदर्श शिक्षक महापौर पुरस्कार (२००८), महाराष्ट्र शासनाचा आदर्श शिक्षक राज्य पुरस्कार (२०१६) अखिल भारतीय साने गुरुजी कथामालेचा उत्कृष्ट कथानिवेदक पुरस्कार (२००८) हे मराठी पुस्तक वाचकांसाठी अत्यंत उपयुक्त आहे.