काही लोकांना जमिनीखाली पाणी कुठे लागेल हे समजतं. पण एका व्यक्तीला सोन्याचे साठे कुठे असतील, हे जणू अतींद्रिय शक्तीनं कळायचं. निम्मं आयुष्य जाईपर्यंत त्यानं कुदळीला हातसुद्धा लावला नव्हता; पण पुढील सतरा वर्षे तो उत्खननात सदैव गुंतला होता, उत्खननाबद्दल प्राथमिक ज्ञानही नसलेल्या या माणसानं आधुनिक पुरातत्त्वाचा शास्त्रीय पाया घातला.
पोलंडच्या सरहद्दीजवळ 'नेउ बकोच' नावाच्या लहानशा खेड्यात ६ जाने. १८२२ रोजी त्याचा जन्म झाला. हे बाळ पुढे लक्षाधीश बनेल किंवा जमिनीखाली गाडला गेलेला प्रचंड खजिना तो उजेडात आणेल, हे त्या वेळी कुणाला कसं समजणार ? त्या 'सुवर्णयोगी' व्यक्तीचं नाव होतं हाइनरिश श्लीमान.