जॉन ग्रे यांच्या या पुस्तकात पुरुष आणि स्त्री यांच्यासाठी अनुक्रमे ‘मार्स’ आणि ‘व्हीनस’ ही रूपके वापरून त्यांच्यातील संबंधांचा सखोल विचार मांडला आहे. पुस्तकाचा विषय ‘कलह’ असला तरी लेखकाच्या खेळकर शैलीमुळे तो गंभीर न वाटता अत्यंत उद्बोधक वाटतो. आजच्या काळात जीवनातील गुंतागुंतीमुळे आणि संवादाच्या अभावामुळे स्त्री-पुरुष सहजीवन ताणतणावाखाली आले असल्याचे ग्रे सांगतात. आपल्या चित्तवृत्तींसाठी शरीरात स्रवणारी टेस्टोस्टेरॉन आणि ऑक्सिटोसीन यांसारखी संप्रेरके कशी कारणीभूत असतात, याचे सुंदर विवेचन यात केले आहे. ताणतणाव कमी करण्यासाठी संप्रेरकांचे प्रमाण संतुलित ठेवण्याकरिता आहारविहार आणि आचार-विचारांत कोणते बदल करावेत, याचे मार्गदर्शन पुस्तकात मिळते. वादविवादापूर्वीचे संकेत, भांडताना घ्यायची काळजी आणि तात्पुरती विश्रांती याबद्दलच्या टिप्सवाद टाळण्यास मदत करतात. एका जोडीदारानं दृष्टिकोन बदलल्यास नातेसंबंध कसे सुरळीत होतात आणि त्यासाठी समुपदेशकाचे महत्त्व किती असते, हे जॉन ग्रे यांनी प्रभावीपणे पटवून दिले आहे.